Дүмшелердің кесірінен Қазақстан екі оттың арасында қалмасын

Имам-молдалардың әлем желіде отырып алып христиандар мен иудейлерге қарсы өшпенді уағыз айтуы, қорлық сөз айтуы тыйылмай тұр. Осы проблема жөнінде «Демос» адам құқығын қорғау ұйымының төрағасы Тұрарбек Құсайынов әлеуметтік желідегі 40-жуық медиа материалды тізімдеп, Мәдениет және ақпарат министрлігіне арызданған. Аида Балаева басқаратын министрлік антисемиттік 11 материалда заң бұзушылық барын мойындап, ол материалдарды жоюға уәде берген, бірақ әлі уәдесінің үдесінен шыққан жоқ. Ал христиандарға қарсы ксенофобиялық 20 материалдың екеуін ғана заңға қайшы деп өшірткен. Жойылмай қалған христианофобиялық сипаты анық 17 материалдың басым бөлігі Қазақстан мұсылмандары діни басқармасына (ҚМДБ) бағынышты сайттар мен солардың уағызшы «ұстаздарының» әлеуметтік желідегі арналарында әлі тұр.

ҚР ҚК-нің 174-бабында көрсетілген жазаға сәйкес келетін, яғни ұлттық және дін араздығын қоздыратын материалдарды жоюды Мәдениет және ақпарат министрлігі былайша жүзеге асырады: министрлік құрамындағы Дін істері комитеті аталмыш материалдарға сараптама жасайды да, осы шешімді Ақпарат комитетіне береді, ал Ақпарат комитеті ксенофобиялық деп танылған материалдарды жоюға әрекеттенеді. Дегенмен, Ақпарат комитеті де осы жағдайда өзінің функциясын толық атқармай отыр.

Министрлік құрамындағы Дін істері комитетінің ұстанымы тіпті біржақты, көбіне ҚМДБ-ға бұра тартады. Ақиқатында, Қазақстан заңдары бойынша діни салада бейтарап болуы тиіс Дін істері комитеті үнемі ҚМДБ-ға басымдық береді. Мұны біз жанама факторлардан да байқаймыз. Мысалы, министр А.Балаеваның орынбасары Қанат Ысқақов «дін мемлекеттен бөлек» деген тезисті бұзып, 26 желтоқсандағы балама кандидатсыз өткен мұсылмандар құрылтайында мүфтиятта реформа жасағысы келмейтін Наурызбай Өтпеновтің қайтадан 5 жылға бас мүфти болуын қадағалап отырды. Ал қазақстандықтар Наурызбай Өтпеновтің бас мүфти болған соңғы бес жылда ҚМДБ имамдары мен «ұстаздары» тарапынан неше түрлі заң бұзушылықтың өршіп кеткені жөнінде әлі де дабыл қағуда. Соған қарамай кеше ғана ҚМДБ өткізген тағы бір жиында Дін істері комитетінің төрағасы Ержан Нүкежанов мүфтият қызметкерлерімен бірге жүр. Төменде жарияланған суретте Е.Нүкежановтың А.Балаева басқаратын министрліктің жауапты қызметкері емес, Бас мүфти Н.Өтпеновтің орынбасарындай әсер береді. Ал ҚМДБ имамдарының көзге ұрып тұрған христианофобиялық медиа материалдарында «заң бұзушылық жоқ» деп шешім берген Дін істері комитетінің ісін қалай тәпсірлейміз?!. Христиандар мен иудейлердің құқықтары ҚМДБ молдалары тарапынан өрескел бұзылғаны жөніндегі мыңдаған арыз халықаралық деңгейде дау туғызғанда осы олқы саясат үшін кім жауап береді?!. Бас мүфти Н.Өтпенов пе? Әрине, жоқ. «Дін мемлекеттен бөлек» деп жалт беретіннің бірі осы діндар емес пе... Қандай жағдай болмасын, ішкі және сыртқы саясатқа жауапты – ҚР Конституциясының кепілі – президент Қасым-Жомарт Тоқаев болып қала береді. Президент Қасым-Жомарт Тоқаев конфессияаралық келісім мен тұрақтылықты сақтаудың Қазақстан үшін әрдайым өзекті екеніне жіті назар аударып келеді. Ол 2023 жылы Біріккен Ұлттар Ұйымы Бас ассамблеясының 78-сессиясындағы мәлімдемесінде конфессияаралық келісім, ұлтаралық татулық Қазақстан үшін аса маңызға ие екенін айтқан және осы бағыт бойынша ішкі саясатта да қатаң позицияда екенін, дін араздығын қоздырушылармен аяусыз күрес жүргізетінін бірнеше мәрте мәлімдеген. Соны көріп-біліп отырған діни конфессиялар, атап айтқанда, христиандық және иудейлік дін өкілдері «бетегеден биік, жусаннан аласа» болып, тып-тыныш жүр. Олардан проблема туындаған емес. Ал ҚМДБ имамдары мен «ұстаздары» басқа дін өкілдеріне қарсы өшпенді уағызын тоқтатпай отыр. Осы салаға жауапты министрлік ҚМДБ-ның өрескел өшпенді әрекетін жасырып қалғысы келеді. Әйтпесе, Дін істері комитеті «барды – бар, жоқты – жоқ» деп әділ сараптама беретін еді ғой. Ал Ақпарат комитеті ксенофобиялық материалдарды уақыт созбай жоюға тиіс. Әлде бұл меморгандар Қазақстанның халықаралық дауға шатылғанын күтіп жүре бере ме?!! Ораз ӘЛІМБЕК, журналист. Facebook жазбасы. Фото көрнекілік үшін.