Биыл еліміздің бірқатар мектептерінде бірнеше сабақты кіріктіріп оқыту пилоттық жобасы іске қосылмақ. Осыған орай белсенді ұстаз Қабыл Шілдебай өз пікірін білдіріп, әріптестеріне сұрау салды деп жазады Democrat.kz.
"Министріміз былай дейді:
«Математика пәні мұғалімдерінің сұранысы бойынша пилоттық жоба 20 өңірге енгізілді. Онда алгебра мен геометрия біріктіріліп (кіріктіріліп) оқытылады.
Мұғалімдер жұмыссыз қалмайды. Егер бұл жоба өз-өзін ақтамаса, бұрынғы жүйеге қайта көшеміз».
Бұрынғысы — алгебра пәні мен геометрия пәні жеке-жеке оқытылып жүрген бүгінгі оқытуымыз.
Алгебра және анализ бастамасы болсын, топология (кеңістіктің үзілмей созылуы) болсын, геометрия болсын — бәрі де математика ғылымына жатады. Сайып келгенде, ғылым біртұтас.
Түсінуі мен түсіндірілуі жеңіл болсын деп, ғалымдар ғылымды бөліп-бөліп қарастырады. Музыка пәні де математика ғылымынан бөлініп алынған. «Математика» атауында тұрған ештеңе жоқ.
Реформа қашан жасалады? Қолдағы бар нұсқа өміршеңдігін жойған кезде реформа жасалады.
Қазіргі кездегі оқушылар үшін проблема — 8–9-сыныпқа арналған геометрия оқулығы.
Әрбір тақырыпқа берілетін есептер толық шығарылуы керек. Қазіргі аптасына 1 сағаттық оқыту кезінде тақырыпқа берілген тапсырмаларды оқушылар толық шығара алмайды.
НИШ-те жоғарыдағы екі пән біріктіріліп оқытылады екен. Жай мектептің балаларына оның деңгейі қолжетімді бола ма?
Пилоттық жоба бойынша «Математика» атауымен оқытылатын пән аптасына неше рет жүргізіледі? Аптасына 3 рет оқытылатын алгебра пәніне геометрия пәні қосарланып беріліп, сол 3 сағатқа сыйғызыла ма? Әлде сағат саны сақталып, 4 сағат болып қала ма?
Бұл туралы Оқу-ағарту министрі түсінік бермейді.
Екі пән кіріктіріліп өткенде, мысалы, «Теңдеулер» тақырыбын оқығанда түзудің теңдеуі мен жазықтықтың теңдеуін қалай ашып түсіндіреміз?
Пифагор теоремасын үшбұрыштар тақырыбында бірдеңе етіп түсіндірерміз.
Пилоттық жоба бойынша жұмыс жасап жатқан мектептер бар ма?
Сынақтан өтіп жатқан әріптестерден хабардар болып отырайық.
Ойларыңызды ортаға салыңыздар, әріптестер!" деп жазды Қабыл Шілдебай.
Еске салайық, Оқу-ағарту министрі Ғани Бейсембаев мектеп пәндерін біріктіру туралы ұсынысқа қатысты түсініктеме берген еді.
"Пәндерді біріктіру немесе кіріктіру өңірлердегі мектептерде пилоттық жоба ретінде енгізу жоспарлануда. Пәндерді біріктіру мәселесі сарапшылардың ұсынысы бойынша, әсіресе алгебра мен геометрия пәндері бойынша әріптестерден көптеген сұрақтар туындағаннан кейін көтерілген болатын. Бұл оны жаппай және ауқымды енгізу дегенді білдірмейді. Мұндай тәжірибе әлемдік үрдісте де бар. Пәнаралық байланыс пен пәндерді кіріктіріп оқыту мәселесі бұрыннан бар. Сондықтан әріптестеріміздің ұсынысына сәйкес, пилоттық жоба ретінде енгізуді жоспарлап отырмыз. Егер оң нәтиже берсе, жоба әрі қарай жалғасады. Ал егер өз өміршеңдігін дәлелдемесе, бұрынғы тәжірибе сақталады", - деді министр.
